مراسم های تجلیل از نودونهمین سالروز استقلال افغانستان در کابل و سایر ولایت ها برگزار شد

امروز 28 اسد، نودونهمین سالروز استرداد استقلال افغانستان است و مراسم تجلیل از این روز در کابل و سایر ولایت‌های افغانستان با برنامه‌های مختلف آغاز شده است.

در شهر کابل نیز، محمداشرف غنی، رئیس جمهور، با گذاشتن اکلیل گل در پای منار آزادی در محوطۀ وزارت دفاع، این مراسم را آغاز کرد.

در مراسم امروز برعلاوۀ چهره‌های سیاسی - نظامی، حامدکرزی، رئیس جمهور پیشین افغانستان، جنرال عبدالرشید دوستم، معاون اول رئیس جمهور، محمدحنیف اتمر، مشاور امنیت ملی، عبدالله عبدالله، رئیس اجرائیه و محمد محقق معاون وی، شاهدخت هندیه، دختر غازی امان‌الله خان نیز حضور داشت.

در این روز جاده‌های مرکزی شهر کابل و سایر شهرهای بزرگ شاهد تدابیر جدی امنیتی است و نیروهای امنیتی افغان در احضارات درجه یک به سر می‌برند.
پرچم‌های سه‌رنگ در جاده‌ها، بر سر مغازه‌ها و وسایط شهروندان در شهر کابل به چشم می‌خورد.

شهروندان افغان، با برنامه‌های مختلف فرهنگی – ادبی از سالروز استرداد استقلال کشور شان، تجلیل می‌کنند.

شهر جلال‌آباد ولایت ننگرهار، جایی که مقبره‌های امان‌الله خان، بانی استقلال افغانستان و ملکه ثریا خانم وی، هست، شاهد برنامه‌های مختلف جشن و پایکوبی است.
99 سال قبل از امروز، غازی امان‌الله خان، پادشاه وقت افغانستان، در 28 اسد سال 1298 خورشیدی، روز استقلال کشور را از بریتانیا اعلام کرد.