د بهرنیو چارو وزیر مولوی امیرخان متقی، د افغانستان لپاره د چین له ځانګړی استازی سره په لیدنه کې د دواړو هیوادونو ترمنځ د دوه اړخیزو اړیکو، سیمه ییز وضعیت او د ګډو همکاریو پر لا پراختیا خبرې کړی دی.
د ریاست الوزراء اقتصادی مرستیال کابل کې د ابوحنیفه د نړیوال نندارتون د پرانستې پر مهال وویل، ا.ا د نیمګړو اقتصادی چارو د بشپړولو ترڅنګ د بنسټیزو پروژو، سیمه ییز اتصال او سوداګرۍ د پراختیا لپاره هڅې کوی؛ هغه د واخان اقتصادی او سوداګریز سړک د دغو هڅو یوه بېلګه وبلله او ویې ویل، افغانستان غواړی خپل سرحدونه د ګواښ پر ځای د اقتصادی مشارکت د وصل پر نقطو بدل او کورنیو تولیداتو ته سیمه ییز او نړیوال بازارونه پیدا کړی.
د صنعت او سوداګرۍ وزارت وایی، د دغه وزارت وزیر او د ایران د انرژۍ وزیر په کابل کې افغانستان ته د شاوخوا دوه زره میګاواټه برېښنا صادرولو، اقتصادی همکاریو او ګډو پانګونو په اړه خبرې کړې دی.
د افغانستان پخوانی ولسمشر حامد کرزی د ښوونکی نړۍوالې ورځې په مناسبت د هېواد له ښوونکو څخه د هغوی د هڅو له امله مننه کړې او زده کړې یې د افغانستان د خپلواکۍ او عزت لپاره حیاتی بللې دی.
د افغانستان-ایران ګډې خونې ویلی چې د ایران د پارلمان د تولید د ملاتړ ځانګړی کمېسیون د رییس محسن زنګنې په مشرۍ یو پلاوی، د دواړو هېوادونو ترمنځ د سوداګریزو او اقتصادی اړیکو د پراختیا په موخه کابل ته راغلی دی.
د افغانستان د بهرنیو چارو وزیر د مسکو فارمټ اتمې غونډې ته ویلی، کابل غواړی له پاکستان سره ستونزې د خبرو له لارې حل کړی، خو وایی اسلام اباد پوځی چلند غوره کړی او افغانستان د هر ډول تېری پر وړاندې دفاع خپل حق ګڼی؛ هغه د امنیت، اقتصاد، پانګونې، سیمه ییز اتصال او متوازن تعامل پر مهمو موضوعاتو هم خبرې کړې دی.
اروپایی ټولنې پر کونړ او هلمند ولایتونو د پاکستان په هوایی بریدونو کې د ملکی وګړو مرګ ژوبله غندلې او له افغانستان او پاکستانه یې غوښتی چې زغم وښیی او خپل اختلافات د خبرو له لارې حل کړی.
د افغانستان دفاع وزارت وایی، پاکستان د افغانستان د ناامنۍ لپاره د وسله والو ډلو ملاتړ او هڅونه کوی او په دې لړ کې یې د نورستان د کامدېش پر لور څو ډلې رااستولې وې چې 28 کسان یې وژل شوی او 32 نور نیول شوی دی؛ دغه وزارت له هغو کسانو چې له دغو ډلو سره یوځای شوی، غوښتی چې له افغان ځواکونو سره اړیکه ونیسی او تسلیم شی.
د ا.ا ویاند وایی، پر کندهار، خوست او پکتیا ولایتونو د پاکستان پوځی رژیم د تېرې شپې بریدونو کې څلور ملکی وګړی شهیدان شوی دی؛ د هغه په وینا، دا ډول «بې احتیاطه او کرکجن اقدامات» د افغان ملت غوسه پاروی او د پاکستانی نظامیانو لپاره به ناوړه پایلې ولری.
د افغانستان د سوداګرۍ او پانګونې خونه وایی چې د دې خونې عمومی رییس په کابل کې د ایران له سفیر سره لیدلی او دواړو لورو د سوداګریزو اړیکو د پراختیا، د صادراتو او وارداتو د زیاتوالی او اقتصادی همکاریو په اړه خبرې کړې دی.
د خوست او کندهار سیمه ییزې سرچینې وایی، پاکستان نن سهار د دواړو ولایتونو پر بېلابېلو سیمو هوایی بریدونه کړی، خو ، په دغو بریدونو کې چا ته مرګ ژوبله نه ده اوښتې.
عبدالمتین قانع ویلی چې د افغانستان او پاکستان ترمنځ کړکېچ د دغو لیدنو له مهمو موضوعاتو څخه و او لورو د اختلافونو د حل او اړیکو د پیاوړتیا لپاره د ګډو هڅو پر دوام ټینګار کړی دی.
د افغانستان د امارتی شرکتونو عمومی رئیس د ایران د انرژۍ له وزیر سره د دواړو هېوادونو ترمنځ د برېښنا، څښاک اوبو او د فاضله اوبو د تصفیې په برخو کې د همکاریو په اړه خبرې کړی او د ایران د انرژۍ وزیر افغانستان ته تر 2000 مېګاواټه برېښنا د برابرولو لپاره د خپل هېواد چمتووالی اعلان کړی دی.
د پنجشېر ځایی چارواکی وایی، د لومړی ځل لپاره د دغه ولایت په عنابه ولسوالۍ کې د فیروزې یو کان موندل شوی او د زېرمې د کچې او کیفیت معلومولو لپاره یو تخنیکی ټیم سیمې ته استول شوی دی.