Share/Save/Bookmark

کد مطلب :61523
تاریخ انتشار : شنبه 11 وری 1397 ساعت : 12:15:49

فلسطین: د غزې په لاریون کې ۱۶ کسان مړه او تر ۱۵۰۰ زیات نور ټپيان شوي دي

د فلسطین په غزه تړانګه کې فلسطینیانو د اسرائیل پر ضد په یوه لوی لاریون او پاڅون لاس پوري کړی دی چې د راتلونکي میاشتي مئي تر ۱۵ نیټې پوري به ادامه ولري.

لاریون چې تېره ورځ د لسګونو زرو په ګډون پيل شو، تر اوسه د اسرائیلي عسکرو په ډزو په کښي ۱۶ کسان وژل شوي او تر ۱۵۰۰ زیات نور ټپیان شوي دي.

د بیا «ورستنېدو ستر لاریون» په نامه دغه لاریون د فلسطین د ځمکې د ورځې په مناسبت پیل شوی او ګډونوال یې غواړي چې یو ځل بیا هغو ځمکو ته ور وګرځي کومې چې اسرائیلي پوځیانو په زور ددوی څخه نیولې. او دوی یې له خپلو سیمو څخه شړلي دي.


د ځمکې ورځ:
په کال ۱۹۷۶ کې د مارچ میاشتې پر ۳۰ مه نیټه اسرائیلي عسکرو د ځمکو د غصب پر مهال ۶ فلسطینیان ووژل او په لسګونو یې نور ټپيان کړل، فلسطینیانو دغې ورځې ته د ځمکې ورځ نوم ورکړ او له هغه راهیسي يې هر کال لمانځي، چې تېره ورځ جمعه یې ۴۵مه کلیزه وه.


یوم النکبه:
اوسني لاریونونه چې تېره ورځ جمعه پيل شول، د راتلونکي میاشتي مئي تر ۱۵مې نیټې پوري به ادامه ولري، د مئي ۱۵ مه فلسطینیان د «یوم النکبه» یا تباهۍ د ورځې په نامه سره یادوي.

فلسطینان د تباهۍ ورځ هغه بولي په کومه چې اسرائیلو په کال ۱۹۴۸ کې د مئي میاشتې پر ۱۴مه نیټه خپل د دولت رسمي اعلان وکړ، فلسطینیانو د مئي ۱۵مه نیټه د تباهۍ په ورځ ونوموله، ځکه چې دوی له خپلو ځمکو او خپلو سیمو څخه هجرت ته اړ کړل شول او پر هیواد او ځمکه یې پردیو راغلیو نیواکګرو خپل دولت اعلان کړ. په فلسطین کې هر کال دغه ورځ «یوم النکبه» په ځانګړیو مراسمو سره لمانځل کیږي.


  د افغان ایرکا خبري اژانس

• اړوند خبرونه:

• ستاسو آندونه

  • ستاسو را لیږل شوي آندونه او پيغامونه د افغان ایرکا خبر راټولونې له تائید وروسته په ویبسایټ کې خپریږي
  • د تور او تهمت پيغامونه نه خپریږي
  • هغه پیغامونه چې په پښتو او دري ژبه نه وي یا په خبر پورې اړونده نه وي، نه خپریږي.