Share/Save/Bookmark

کد مطلب :63632
تاریخ انتشار : شنبه 14 غوایی 1398 ساعت : 16:07:08

د سولې مشورتي لویه جرګه پای ته ورسېده

د سولې مشورتي لویه جرګه د یو، پرېکړه لیک په صادرولو سره پای ته ورسېده. د مشورتي لویې جرګې ګډونوالو، د افغان سولې په اړه، په وروستۍ پنځمه ورځ خپلې غوښتنې او نظرونه په یوه پرېکړه لیک کې له افغان حکومت سره شریکې کړې.

 د جرګې ګډونوالو په تېرو پنځو ورځو کې له طالبانو سره د مذاکراتو یو قالب پر ټاکلو او تلپاتې سولې ته رسېدو لپاره د یوه ځانګړي میکانیزم پر رامنځته کولو بحثونه وکړل. د افغان سولې په اړه د مشورتي لویې جرګې د ګډونوالو سولې ته د رسېدو لپاره د جرګې د کمېټو نظرونه، وړاندیزونه او غوښتنې په ۲۳ مادو کې له افغان حکومت سره شریک کړل.


 په پرېکړه لیک کې راغلي:
 ۱ـ موږ د جرګې ګډونوال په هېواد کې تلپاتې سولې ته ژمن یو.

 ۲ ـ له جګړې څخه د طالبانو لاس اخیستل او د هېواد په بیارغونه کې ونډه اخیستل. ۳ـ د افغان دولت، طالبانو او دیني علماو لخوا د اسلام له سپېڅلي دین څخه د یو واحد تفسر رامنځته کول.

 ۴ ـ په روژه کې د افغان حکومت او طالبانو لخوا د اوربند اعلان او عملي کول

۵ ـ د سولې خبرو کې د افغانستان د اسلامي جمهوري نظام څخه دفاع.

 ۶ ـ د افغانستان اساسي قانون د ملت یوه ملي ارزښتمنه وثیقه ده باید وساتل شي، خو د اړتیا په صورت کې، د دغه اساسي قانون د شمېر موادو تعدیل د سولې له هوکړې څخه وروسته، د هغه اصولي او منل شوي میکانیزم له لارې ممکن دي چې په همدغه اساسي قانون کې وړاندوینه شوې ده.

 ۷ ـ د اساسي قانون په اساس، د ټولو اتباعو د اساسي حقوقو ساتنه او لا پیاوړې کول.

 ۸ ـ د افغان امنیتي او دفاعي ځواکونو ساتنه او پیاوړتیا.

 ۹ ـ له قطر څخه افغانستان ته د طالبانو د سیاسي دفتر انتقالول.

 ۱۰ـ له افغانستان څخه د بهرنیو ځواکونو د مسؤلانه وتلو لپاره عملي مهالوېش ترتیب او تنظم کول.

 ۱۱ ـ له لاسته راغلو فرصتونو او په کور دننه سیاسي اجماع څخه د سولې د پروسې د پیاوړتیا لپاره ګټه پورته کول او د سولې بین الافغاني خبرو اترو ته له یو واحد افغان شموله ادرس څخه ننوتل.

 ۱۲ ـ د سولې خبرو کې د ښکېلو اړخونو لخوا له هر ډول مخکنیو شرطونو څخه ډډه کول.

 ۱۳ ـ د سولې خبرو کې د باور رامنځته کولو په هدف د بندیانو د تبادله او د زندانیانو خوشي کول.

 ۱۴ـ دوامداره سولې ته رسېدو لپاره سیمه ییزه او نړیواله اجماع رامنځته کول. ۱۵ـ د افغانستان په چارو کې د سیمه ییزو مداخلاتو د دوام په صورت کې په رسمي توګه د ملګرو ملتونو د امنیت شورا ته شکایت کول.

 ۱۶ـ د سولې خبرو کې د مشورتي لویې جرګې د استازو د مشورو په رڼا کې یو هر اړخیز او ټول شموله پروګرام تدوین او پلي کول.

 ۱۷ـ د سولې عالي شورا په جوړښت او تشکیلاتو کې اصلاحات رامنځته کول. ۱۸ ـ د سولې خبرو لپاره د یو هر اړخیزه افغان شموله پلاوي رامنځته کول. ۱۹ـ د طالبانو مشروع غوښتنې او مطالبات تشخیصول او د باور رامنځته کولو لپاره لازم او مشروع اقدمامات تر سره کول.

 ۲۰ ـ د جرګې تر پای ته رسېدو وروسته د جرګې د غړو لخوا کلیو او بانډو ته د سولې پیغام رسول.

 ۲۱ ـ د سولې مشورتي لویې جرګې له غړو سره د دولت اړیکې ساتل او د سولې او د سولې د خبرو اترو له پرمختګ څخه باخبره ساتل.

۲۲ـ افغان دولت، وسله وال طالبان، نړیواله ټولنه او د سیمې هېوادونه د مشورتي لویې جرګې مشورو ته درناوی کول.

 ۲۳ـ او د مشورتي لویې جرګې د ۵۰ کمېټو لیدلوري نظریات، وړاندیزونه او بحثونه د رسمي سند په ډول چاپول او خپرول شامل و.


  د افغان ایرکا خبري اژانس

• اړوند خبرونه:

• ستاسو آندونه

  • ستاسو را لیږل شوي آندونه او پيغامونه د افغان ایرکا خبر راټولونې له تائید وروسته په ویبسایټ کې خپریږي
  • د تور او تهمت پيغامونه نه خپریږي
  • هغه پیغامونه چې په پښتو او دري ژبه نه وي یا په خبر پورې اړونده نه وي، نه خپریږي.