Share/Save/Bookmark

کد مطلب :63861
تاریخ انتشار : يکشنبه 30 چنګاښ 1398 ساعت : 16:12:04

د بادغېس په بالامرغاب کې ۵۰۰ سرتېري کلابند دي

د بادغېس د ولایتي شورا رییس عبدالعزیز بېک سلام‌وطندار ته ویلي چې د دغه ولایت د بالامرغاب ولسوالي په شرکت سیمه کې له یوې اوونۍ راهیسې د پوځ په قرارګاه کې د امنیتي ځواکونو د افسرانو او ساتنمنانو په ګډون ۵۰۰ امنیتي او دفاعي ځواکونه د طالبانو په کلابندۍ کې ګير پاتې دي.

د بادغېس د ولایتي شورا رییس زیاتوي، امنیتي ځواکونه د سپکو او درنو وسلو د کمښت ترڅنګ، له یوې اوونۍ راهیسې د خوراکي توکیو له کمښت سره هم مخ دي.

د بېک په خبره، د پوځ له قرارګاه پرته، د بالامرغاب ولسوالي ټولې برخې طالبانو نیولي او یاده ډله د خلکو له کورونو په استفادې د پوځ چورلکو ته د ناستې اجازه نه ورکوي.

د بادغېس د ولایتي شورا رییس وايي، هوايي ځواکونو په بالامرغاب کې د طالبانو له کلابندۍ د ۵۰۰ سرتېرو د خلاصون لپاره تېره شپه د قرارګاه شاوخوا ته د یادې ډلې سنګرونه بمبار کړل چې په پایله کې یې د ښځو او ماشومانو په ګډون، ۱۰ ملکیان وژل شوي دي.

عبدالعزیز بېک خبرداری ورکوي، که حکومت او د غوڅ ملاتړ ځواکونه د یادو سرتېرو د خلاصون لپاره عملیات و نه کړي، انساني ناورین به رامنځ‌ته شي.

د بادغېس والي عبدالغفور ملکزی د طالبانو له لوري د امنیتي ځواکونو کلابندي ردوي، خو په بالامرغاب کې د امنیتي ځواکونو په هوايي بریدونو کې د ۶ ملکي وګړیو وژل کېدل تاییدوي. د نوموړي په وینا، د لومړنیو مالوماتو له مخې، په یادو بریدونو کې ۲۰ طالبان هم وژل شوي دي.

بالامرغاب د بادغېس یوه ناامنه ولسوالي ده او طالبان په دې ولسوالي کې فعال حضور لري. دا ولسوالي په تېرو ۶ میاشتو کې دوه ځله د طالبانو لاس ته ورغلې ده.


  د افغان ایرکا خبري اژانس

• اړوند خبرونه:

• ستاسو آندونه

  • ستاسو را لیږل شوي آندونه او پيغامونه د افغان ایرکا خبر راټولونې له تائید وروسته په ویبسایټ کې خپریږي
  • د تور او تهمت پيغامونه نه خپریږي
  • هغه پیغامونه چې په پښتو او دري ژبه نه وي یا په خبر پورې اړونده نه وي، نه خپریږي.