Share/Save/Bookmark

کد مطلب :64571
تاریخ انتشار : پنج شنبه 8 کب 1398 ساعت : 19:43:53

په بامیان کې د نجونو د لسمې دورې د سکي سیالۍ وشوې

د سکي ملي فدراسیون له لوري او د بامیان ولایت د محلي ادارې په همکاري د نجونو د لسمې دورې د سکي سیالۍ نن د «افغان سکي» په نوم د بابا غره پر لمنه په پولادي دره کې وشوې. له دې سره هم‌مهاله د هلکانو د لرګي سکي د د دویمې دورې سیالۍ هم په یاد ولایت کې وشوې.

د سکي ملي فدراسیون مسوولان وايي، د دغو سیالیو د نجونو په برخه کې ۲۰ سکي وهونکیو نجونو او د هلکانو د لرګي سکي په برخه کې هم ۵۳ سکي وهونکیو هلکانو له یو بل سره سیالۍ وکړې.

د سکي ملي فدراسیون د یادو سیالیو جوړولو موخه د ژمنیو لوبو، په تېره د سکي لوبې دودول او پرمختیا یادوي او وايي، غواړي له دې لارې نړیوالو ته د سولې پیغام ولېږدوي.

د نجونو په سیالیو کې ناظمې خیرزاد، بېګم او فرېبا په ترتیب سره لومړی، دویم او درېیم مقامونه خپل کړل او د هلکانو د لرګي سکي سیالیو کې هم رحمت‌الله، یاسین او نصرالله لومړی، دویم او درېیم مقامونه وګټل.

د افغان سکي د لسمې دورې سیالیو اتله ناظمه خیرزاد چې له تېرو دوو کلونو راهیسې یې د سکي لوبه پیل کړې وايي، د دغو سیالیو په نهمه دوره کې یې څلورم مقام ګټلی و. نوموړې سږ کال په پاکستان کې د سکي لوبو په یوه سیالۍ کې د برونزو مډال هم ګټلی دی.

د هلکانو د سکي سیالیو اتل رحمت‌الله وايي چې دا لوبه یې خوښېږي، خو د بې‌وسۍ له کبله د سکي لوبو د جامو پېرودلو وسه نه لري. رحمت‌الله او همځولي یې د غوړیو له بوشکې او لرګي نه سکي جوړه کړې او پرې لوبې کوي.

د سکي ملي فدراسیون رییس داوود کارګر وايي، سره له دې چې د بامیان ولایت د سکي لوبغاړي لازم امکانات نه لري، خو بیا یې هم له هېواده بهر په سیالیو کې مډالونه ګټلي دي.

نوموړی ټینګار کوي چې د سکي وهونکیو لوبغاړیو د ستونزو د حل لپاره به د المپیک له مسوولانو او د سکي په نړیوال فدراسیون کې د افغانستان له استازیو سره خبرې وکړي.

ټاکل شوې د هلکانو د لسمې دورې د سکي سیالۍ سبا د لسګونو کورنیو او بهرنیو سکي وهونکیو په ګډون په بامیان کې وشي.

بامیان د هېواد د مرکزي ولایتونو له ډلې یو دی چې امن او ډېره واوره په‌کې کېږي او په تېره یوه لسیزه کې ژمنیو لوبو، په تېره د سکي لوبې په‌کې ښه پرمختګ کړی دی. هر کال د سکي محلي، ملي او نړیوالې سیالۍ د سلګونو کورنیو او بهرنیو سکي وهونکیو په ګډون په دغه ولایت کې کېږي.


  د افغان ایرکا خبري اژانس

• اړوند خبرونه:

• ستاسو آندونه

  • ستاسو را لیږل شوي آندونه او پيغامونه د افغان ایرکا خبر راټولونې له تائید وروسته په ویبسایټ کې خپریږي
  • د تور او تهمت پيغامونه نه خپریږي
  • هغه پیغامونه چې په پښتو او دري ژبه نه وي یا په خبر پورې اړونده نه وي، نه خپریږي.