Share/Save/Bookmark

کد مطلب :64879
تاریخ انتشار : جمعه 9 غبرګولی 1399 ساعت : 20:31:13

ملي امنیت شورا: له طالبانو سره اوربند دوام لري

ملي امنیت شورا وايي، د طالبانو له لوري د خورو ورو بریدونو سره سره له دې ډلې سره اوربند دوام لري او هڅه کېږي چې نور هم دوام وکړي.

د ملي امنیت شورا ویاند جاوېد فیصل د افغان حکومت او طالبانو ترمنځ د اختر په درې ورځو کې له اوربند څو ورځې وروسته نن پر خپلې ټویټرپاڼې لیکلي چې د طالبانو له خورو ورو بریدونو سره سره له طالبانو سره د دې ډلې اوربند دوام لري.

نوموړی وايي، «اوربند یو پېچلی عملیاتي اقدام دی چې په‌کې د پېښو مخنیوي لپاره د پام وړ او دوامداره همغږۍ ته اړتیا ده او په دې برخه کې به هڅې دوام وکړي.»

طالبانو د اختر په درې ورځو کې اوربند اعلان کړ. که څه هم دې ډلې تر اوسه د اوربند د دوام په اړه څه نه دي ویلي، خو د هېواد په ځینو برخو کې لا هم شته.

ملي امنیت شورا تر دې وړاندې د طالبانو بندیانو خوشې کول په اوربند او مخامخ بین‌الافغاني خبرو اترو پورې تړلي بللي وو.

د طالبانو له لوري د اوربند له اعلان وروسته، ولسمشر محمداشرف غني د دوو زرو طالب بندیانو د خوشې کولو فرمان صادر کړ. د راپورونو له مخې، تر اوسه د دغو دوو زرو بندیانو له ډلې زر هغه یې د هېواد له بندخونو خوشې شوي دي.

ملي امنیت شورا پرون وویل چې د طالبانو یو تخنیکي پلاوی په کابل کې دی او د بندیانو د تبادلې پر څرنګوالي له افغان حکومت سره ګډ کار کوي.

افغان حکومت د امریکا او طالبانو ترمنځ د سولې هوکړه‌لیک تر لاسلیک وروسته دوه زره طالب بندیان خوشې کړي او طالبانو هم د حکومت ۳۴۱ بندیان خوشې کړي دي.

د امریکا او طالبانو ترمنځ په لاسلیک شوي هوکړه‌لیک کې لیکل شوي چې افغان حکومت باید ۵ زره او  طالبان باید زر بندیان خوشې کړي.


  د افغان ایرکا خبري اژانس

• اړوند خبرونه:

• ستاسو آندونه

  • ستاسو را لیږل شوي آندونه او پيغامونه د افغان ایرکا خبر راټولونې له تائید وروسته په ویبسایټ کې خپریږي
  • د تور او تهمت پيغامونه نه خپریږي
  • هغه پیغامونه چې په پښتو او دري ژبه نه وي یا په خبر پورې اړونده نه وي، نه خپریږي.