Share/Save/Bookmark

کد مطلب :65027
تاریخ انتشار : شنبه 14 چنګاښ 1399 ساعت : 22:59:27

په افغانستان کې د کرونا ناروغانو ټول شمېر ۳۲۶۷۲ رسیدلی

د عامې روغتیا وزارت په تېرو څلیریشت ګړیو کې د کرونا ویروس له ۳۴۸ مثبتو پېښو خبر ورکوي، چې د وروستیو اوونیو په تناسب د پام وړ کمی ښیي.

په داسې حال کې، چې د کرونا وبا ګواښ پای ته ندی رسېدلی؛ خو په دې وبا د اخته کسانو په شمېر کې کمي ډېرې پوښتنې را ولاړې کړې دي. خلکو ته یې تر اوسه علت ندی روښانه شوی؛ خو د عامې روغتیا وزارت وایي، د خلکو پوهاوی او د مراجعه کوونکيو کمی د دې خبرې اصلي علت دي.

د عامې روغتیا وزارت د ویاند مرستیاله معصومه جعفري وایي، د ګراف د راټیټېدو یو دلیل د خلکو نه مراجعه او د عامه پوهاوي پروګرام دی؛ ځکه، نو په وروستیو څلیریشت ګړیو کې د کرونا وبا له کبله نوولس کسان مړه شوي او یو زرو اته سوه دري دېرش نور بېرته ښه شوي دي.

کابل ښاریان عامې روغتیا وزارت پر کم کارۍ تورنوي او وایي، د کرونا د نښو له لیدو سره یې روغتونونو ته د مراجعې پر ځای د ځان درملنه کړې ده.

د عامې روغتیا وزارت د څرګندونو له مخې، په افغانستان کې پر کرونا وبا د اخته کسانو شمېر دوه دېرش زره شپږ سوه دوه اویاو ته رسېدلی دی.

ویل کیږي، چې د کرونا وبا له کبله د مړو شویو کسانو ټول شمېر ۸۲۶ تنو ته او د بېرته رغیلیو هغه ۱۹ زره او یو سل و څلور شپېته تنو ته رسیږي.

دا په داسې حال کې ده، چې په ټوله نړۍ کې پر کرونا د اخته کسانو شمېر ۱۱۰۹۳۱۸۲، د مړینې هغه ۵۲۵۴۹۱ او د رغیدلیو ۵۸۹۰۰۵۲ ته رسیدلی دی.


  د افغان ایرکا خبري اژانس

• اړوند خبرونه:

• ستاسو آندونه

  • ستاسو را لیږل شوي آندونه او پيغامونه د افغان ایرکا خبر راټولونې له تائید وروسته په ویبسایټ کې خپریږي
  • د تور او تهمت پيغامونه نه خپریږي
  • هغه پیغامونه چې په پښتو او دري ژبه نه وي یا په خبر پورې اړونده نه وي، نه خپریږي.