Share/Save/Bookmark

کد مطلب :65087
تاریخ انتشار : يکشنبه 29 چنګاښ 1399 ساعت : 17:54:57

د کانکور ازموينې لومړی پړاو نن په ۱۷ ولايتونو کې پيل شو

د لوړو زده‌کړو وزارت وايي، د کانکور ازموينې لومړی پړاو د هېواد په ۱۷ ولايتونو کې نن پيل شوی دی.

د لوړو زده‌کړو وزارت مرستيال وياند محمد حنيف فرزان خامه پرس ته وويل، د کانکور ازموینې لومړي پړاو کې ارزګان، بادغیس، پکتیکا، پنجشېر، دایکندي، زابل، سرپل، سمنګان، غور، فراه، کندز، کندهار، کونړ، نورستان، لوګر، نیمروز او میدان وردګ ولایتونه شامل دي.

نوموړي زياته کړه، د کانکور ازموینو دویم پړاو به د لوی اختر په څلورمه پیل شي چې هلمند، غزني، پکتیا، خوست، کاپیسا، بامیان، لغمان او هرات ولایتونه پکې شامل دي.

د هغه په خبره، د کانکور ازموینو درېیم پړاو به د لوی اختر څخه اووه ورځې وروسته پیل شي چې فاریاب، جوزجان، بلخ، پروان او بغلان ولایتونه پکې شامل دي او دغه راز څلورم پړاو کې ننګرهار، تخار او بخشان ولایتونه شامل دي.

فرزان زياته کړه، ټاکل شوې چې د سږ کال کانکور ازموینې به د راتلونکې اسد میاشتې تر پایه په ۳۳ ولایتونو کې پای ته ورسېږي او ورپسې به د سنبلې میاشتې په لومړۍ نېټه د کابل ولایت کانکور ازموینې پیل شي او په شپږو یا اوو پړاوونو کې به واخیستل شي.

د فرزان په خبره، د وړاندوینو له مخې به سږ کال شاوخوا ۲۱۰ زره زده کوونکي په کانکور ازموینه کې ګډون وکړي.

د دوی په خبره، روان کال به د افغانستان تحصيلي بنسټونه د ۱۴۶زره ۹۲۲ په شاوخوا کې زده‌کوونکي د لوړو زده کړو لپاره جذب کړي.

شاوخوا لس ورځې وړاندې له کرونا سره د مبارزې بېړنۍ کمېټې پرېکړه وکړه چې د کانکور ازموینې دې د روغتیا وزارت له لارښوونو سره سمې پیل شي.


  د افغان ایرکا خبري اژانس

• اړوند خبرونه:

• ستاسو آندونه

  • ستاسو را لیږل شوي آندونه او پيغامونه د افغان ایرکا خبر راټولونې له تائید وروسته په ویبسایټ کې خپریږي
  • د تور او تهمت پيغامونه نه خپریږي
  • هغه پیغامونه چې په پښتو او دري ژبه نه وي یا په خبر پورې اړونده نه وي، نه خپریږي.