Share/Save/Bookmark

کد مطلب :65557
تاریخ انتشار : چهار شنبه 5 لیندۍ 1399 ساعت : 19:28:30

صدیقي: د سولې خبرې اترې لا هم په ټپه ولاړې دي

د ولسمشرۍ ماڼۍ ویاند صدیق صدیقي نن په کابل کې د یوې خبري غونډې پر مهال وویل، په دوحه کې د سولې بین‌الافغاني خبرې اترې لا هم په ټپه ولاړې دي.

 د نوموړي په وینا، طالب ډله د دغه وضعیت د دوام مسووله ده.

هغه زیاتوي، که څه هم حکومت او د دولت د سولې مرکچي پلاوی د سولې خبرواترو د پرمختګ لپاره هڅې کوي، خو د دغو خبرواترو د پر مخ وړلو لپاره د طالب ډلې غوښتنې بې‌ځایه، د ملي ګټو او اساسي قانون خلاف دي. صدیقي وايي، حکومت نه شي کولای د یادې ډلې هر ډول غوښتنې ومني.

د ولسمشر ویاند پر طالبانو د نیوکې ترڅنګ وايي، که څه هم دولت سولې ته د ښه نیت او بین‌الافغاني خبرواترو د پیل لپاره ۵ زره طالب بندیان خوشې کړل، خو دې ډلې د وضعیت ښه‌والي لپاره هېڅ ډول اقدام و نه کړ.

صدیقي وايي، که طالب ډله د سولې راتلو او اوربند په اړه د افغانانو غوښتنه نه مني، د نړیوالې ټولنې غوښتنه خو دې ومني.

دا په داسې حال کې ده چې څو ورځې وړاندې داسې راپورونه خپاره شول چې د دولت او طالبانو مرکچیان د خبرواترو پر کړنلارې هوکړې ته رسېدلي دي.

دوه‌نیمې میاشتې کېږي چې د قطر په دوحه کې د دولت او طالبانو ترمنځ د سولې خبرې اترې پیل شوي، خو تر اوسه دواړه لوري نه دي توانېدلي چې د دغو خبرواترو لپاره د کړنلارې په اړه هوکړې ته ورسېږي.


  د افغان ایرکا خبري اژانس

• اړوند خبرونه:

• ستاسو آندونه

  • ستاسو را لیږل شوي آندونه او پيغامونه د افغان ایرکا خبر راټولونې له تائید وروسته په ویبسایټ کې خپریږي
  • د تور او تهمت پيغامونه نه خپریږي
  • هغه پیغامونه چې په پښتو او دري ژبه نه وي یا په خبر پورې اړونده نه وي، نه خپریږي.