Share/Save/Bookmark

کد مطلب :65767
تاریخ انتشار : سه شنبه 7 سلواغه 1399 ساعت : 21:34:45

د ملابرادر په مشرۍ ایران ته د طالب پلاوي سفر

د طالب ډلې یو پلاوی په قطر کې د افغان دولت او طالبانو د مرکچیانو ترمنځ د سولې دویم پړاو خبرو له پيلېدو څه باندې دوه اوونۍ وروسته ایران ته تللی دی.

په دوحه کې د طالبانو د سیاسی دفتر ویاند محمدنعیم ویلي چې یاد پلاوی د ملاعبدالغني برادر په مشري او د ایران په رسمي بلنه یاد هېواد ته تللی دی.

د نوموړي په وینا، په دغه سفر کې به له ایران سره پر اړیکو، د افغان کډوالو پر ستونزو او د افغانستان او سیمې پر سیاسي او امنیتي وضعیت خبرې وشي.

په ورته وخت کې د بهرنیو چارو وزارت په یوه خبرپاڼه کې ویلي چې افغان حکومت ایران ته د طالب پلاوي د سفر په اړه خبر دی او تهران له دغه سفر وړاندې ورسره په دې اړه خبرې کړې دي.

د ایران د بهرنیو چارو وزارت ویاند سعید خطیب‌زاده هم رسنیو ته ویلي چې د طالبانو یو پلاوی ایران ته ورغلی دی. د هغه په خبره، یاد پلاوی به د ایران د بهرنیو چارو د وزیر تر څنګ، له ځینو نورو چارواکو سره وګوري او د افغان سولې پر اړوندو مسایلو به ورسره بحث وکړي.

د طالبانو لوړپوړي پلاوی داسې مهال ایران ته سفر کړی چې په قطر کې د افغان دولت او طالب ډلې د مرکچیانو ترمنځ څه باندې دوه اوونۍ وړاندې د سولې دویم پړاو خبرې پیل شوې، خو د راپورونو له مخې، تر اوسه یې په مذاکراتو کې کوم پرمختګ نه دی کړی.

بله‌خوا د دولت د سولې مرکچي پلاوي نادر نادري نن پر ټویټر لیکلي چې طالبان له تېرو ۹ ورځو راهیسې ورسره د جګړې د پای او سولې ته د رسېدو لپاره مخامخ بحث ته نه دي حاضر شوي.


  د افغان ایرکا خبري اژانس

• اړوند خبرونه:

• ستاسو آندونه

  • ستاسو را لیږل شوي آندونه او پيغامونه د افغان ایرکا خبر راټولونې له تائید وروسته په ویبسایټ کې خپریږي
  • د تور او تهمت پيغامونه نه خپریږي
  • هغه پیغامونه چې په پښتو او دري ژبه نه وي یا په خبر پورې اړونده نه وي، نه خپریږي.