Share/Save/Bookmark

کد مطلب :66652
تاریخ انتشار : پنج شنبه 25 وږی 1400 ساعت : 19:11:31

یوناما: افغانستان کې بشري وضعیت ناهیلی کوونکی دی

د کډوالو په چارو کې د ملګرو ملتونو عالي کمېشنر فیلیپو ګرانډي وايي چې په افغانستان کې بشري وضعیت د اندېښنې وړ دی. په افغانستان کې د ملګرو ملتونو استازولۍ یا یوناما نن په یوه خبرپاڼه کې لیکلي چې فیلیپو ګرانډي دا موضوع کابل ته د خپل درې ورځني سفر په پای کې کړې ده.

دغه کمېشنر ویلي، که په افغانستان کې عامه خدمات او اقتصاد سقوط وکړي، دغه هېواد به له لا ډېر رنځ، بې‌ثباتۍ او بې‌ځایه کېدو سره مخ شي.

هغه ټینګار کړی چې نړیواله ټولنه باید ژرترژره له افغانستان سره اړیکه ونیسي، څو په دغه هېواد کې د انساني ناورین مخه ونیولی شي. د فیلیپو ګرانډي په وینا، افغانستان کې انساني ناورین به نه یوازې د سیمې، بلکې د نړۍ په کچه هم بدې پایلې ولري.

نوموړي د هېواد په دننه او بهر کې د بې‌ځایه شویو افغانانو د بیړني ملاتړ غوښتنه کړې او ویلي یې دي چې تر اوسه له درې‌نیم میلیونه ډېر کسان له خپلو مېنو بې‌ځایه شوي دي. یوازې په روان کال کې ۶۳۰ زره کسان له خپلو کورونو بې‌ځایه شوي دي.

د کډوالو په چارو کې د ملګرو ملتونو کمېشنر ویلي چې اوس په افغانستان کې له ۱۸ میلیونه ډېر کسان بیړنیو بشري مرستو ته اړتیا لري. دغه سازمان تر دې مخکې ویلي و چې په هرو درېوو افغانانو کې یو یې نه پوهېږي چې د راتلونکي یوه وخت ډوډۍ له کومه کړي.

یوناما خبرداری ورکړی له پنځو کلونو د کم‌عمره ماشومانو نږدې نیمايي برخه به په راتلونکو دولس میاشتو کې له سختې خوارځواکۍ سره مخ شي.


  د افغان ایرکا خبري اژانس

• اړوند خبرونه:

• ستاسو آندونه

  • ستاسو را لیږل شوي آندونه او پيغامونه د افغان ایرکا خبر راټولونې له تائید وروسته په ویبسایټ کې خپریږي
  • د تور او تهمت پيغامونه نه خپریږي
  • هغه پیغامونه چې په پښتو او دري ژبه نه وي یا په خبر پورې اړونده نه وي، نه خپریږي.