Share/Save/Bookmark

کد مطلب :65987
تاریخ انتشار : چهار شنبه 25 وری 1400 ساعت : 18:27:42

وحید عمر: جو بایډن به ژر د خپلو ځواکونو وتلو طرحه ولسمشر غني سره شریکه کړي

د ولسمشر سلاکار او د ولسمشرۍ ماڼۍ د عامه او ستراتیژیکو اړیکو ادارې مشر وحید عمر وایي، چې د امریکا متحده ایالاتو ولسمشر جو بایډن ژر له ولسمشر اشرف غني سره خبرې او له افغانستانه د خپلو ځواکونو وتلو طرحه شریکه کړي.

ښاغلي عمر پر ټوېټر لیکلي، چې د افغانستان حکومت او د امریکا متحده ایالاتو تېر کې په تکراري ډول له افغانستانه د ځواکونو پر وتلو خبرې کړې دي. هغه ټینګار کوي چې افغان حکومت د امریکا له خوا د دوی ځواکونو وتلو په اړه هرې پرېکړې ته، درناوی کوي.

د عمر په وینا، افغان امنیتي او دفاعي ځواکونه له تېرو دوو لسیزو راهیسې په لوړ مورال له خلکو ساتنه کوي او دمګړۍ ۹۸ سلنه عملیاتونه په خپلواک ډول د دې ځواکونو له خوا کیږي.

د ولسمشر سلاکار په دوام کې لیکلي، چې افغان امنیتي او دفاعي ځواکونه به راتلونکې کې هم د خپلواکه عملیاتو بشپړ ترسره کولو وړتیا ولري.

دا په داسې حال کې ده چې تېره ورځ واشنګټن پسټ امریکایي ورځپاڼې د جو بایډن له برنامو خبرو سرچینو له قوله راپور کې ویلي و، ښاغلی بایډن هوډ لري چې له افغانستانه د سپټمبر تر ۱۱مې ټول امریکایي ځواکونه وباسي.

د دې ورځپاڼې د راپور پر بنسټ، د امریکایي ځواکونو بشپړ وتل د ۲۰۰۱ د سپټمبر ۱۱مې پېښې شلم تلین کې ترسره کیږي. د دې راپور له مخې، ښاغلي بایډن له افغانستان د ځواکونو وتلو برنامه نن رسنیزه کوي.

دمګړۍ افغانستان کې شاوخوا ۲۵۰۰ امریکایي ځواکونه شتون لري. د دې نظامیانو ماموریت ښوونه، مشوره ورکول او ځینې وختونه له افغان ځواکونو ملاتړ دی.

د دوحې تړون پر بنسټ چې د ۱۳۹۸ لمریز کال د کب په لسمه د امریکا او طالبانو ترمنځ لاسلیک شو، امریکایي ځواکونه باید د مې میاشتې تر لومړیو له افغانستانه ووځي.

له دې وړاندې طالبانو خبرداری ورکړی و، که امریکایي ځواکونه په ټاکلې موده کې افغانستان پرېنږدي، د دې ډلې له خوا دا د دوحې تړون څخه سرغړونه ده او دوی به پرې خپل بریدونه بېرته له سره پیل کړي.

دې ډلې تازه تازه بیا ویلي، تر هغې چې له افغانستانه ټول بهرني ځواکونه و نه وځي، دوی به په هېڅ ناسته کې چې د افغانستان په اړه پرېکړه په کې کیږي، ګډون و نه کړي. د طالبانو نغوته د استانبول ناستې ته ده، چې ټاکل شوې د اپرېل په ۲۴مه ترسره شي.


  د افغان ایرکا خبري اژانس

• اړوند خبرونه:

• ستاسو آندونه

  • ستاسو را لیږل شوي آندونه او پيغامونه د افغان ایرکا خبر راټولونې له تائید وروسته په ویبسایټ کې خپریږي
  • د تور او تهمت پيغامونه نه خپریږي
  • هغه پیغامونه چې په پښتو او دري ژبه نه وي یا په خبر پورې اړونده نه وي، نه خپریږي.